Кўпкари бўйича Президент кубоги ўйинларидаги тартибсизликларда иштирок этган 65 нафар кишига турли жазо чоралари қўлланди.
Ўш вилояти ички ишлар бошқармасидан маълум қилишларича, 9 кишига нисбатан ҚР Жиноят кодексининг 280-моддаси («Безорилик») билан иш қўзғатилган. Қора-Сув туман суди 5 нафар шахсга икки ой ҳибс чорасини қўлллаган, тергов изоляторида сақланаётган тўрт нафар шахсга нисбатан эҳтиёт чорасини 4 сентябрь куни танлайди.
Қолган 56 нафар шахсга нисбатан ҚР Маъмурий жавобгарлик тўғрисидаги кодекснинг 126-моддаси (“Майда безорилик”) қўлланган.
Ички ишлар бошқармаси ҳодиса жойидан олинган видеоматериалларни ўрганиш орқали тартибсизликларга алоқадор шахсларни аниқлашда давом этмоқда.
Ўш шаҳрида Мустақиллик байрамига бағишланган Кўпкари бўйича Президент кубоги ўйинлари 31 август куни тартибсизликлар билан якунланган эди. Ижтимоий тармоқларда мусобақа бўлиб ўтаётган «Толойкон» ипподроми майдонига бир гуруҳ одам югуриб чиқаётган видео тарқалди. Гувоҳлар айтишича, ўйин натижасидан норози бўлган мухлислар ҳакамни калтаклаган.
Соғлиқни сақлаш вазирлигининг маълум қилишича, тартибсизликлар пайтида 100 га яқин одам жумладан бир нафар милиция ходими жароҳат олган. Бундан ташқари, тез ёрдам машинасининг ойналари синган, ҳайдовчиси енгил тан жароҳатлари олган, унга шифокорлар жойида ёрдам берган.
